ВЫСТУПЛЕННЕ ДЛЯ МАРЫ
13 – 14 КАСТРЫЧНІКА Ў МАСКВЕ АДБЫЎСЯ VII МІЖНАРОДНЫ ДАБРАЧЫННЫ ФЕСТЫВАЛЬ “БЕЛАЯ ТРОСТЬ” З УДЗЕЛАМ ВЯДОМЫХ РАСІЙСКІХ І ЗАМЕЖНЫХ АРТЫСТАЎ, А ТАКСАМА ЮНЫХ ТВОРЦАЎ З ПАГОРШАННЯМІ ЗРОКУ. НАТХНЯЛЬНІЦА ФЕСТЫВАЛЮ “БЕЛАЯ ТРОСТЬ” ЗАСЛУЖАНАЯ АРТЫСТКА РАСІІ ДЗІЯНА ГУРЦКАЯ ЎЖО ТРЭЦІ РАЗ ЗАПРАСІЛА Ў МАСКВУ ЮНУЮ ПАЭТЭСУ ВІКТОРЫЮ СМОЛКУ З БЕЛАРУСКАГА ГОРАДА ГРОДНА.
За сто часін да цягніка
Са мной была на свеце Мара.
Яе чуллівая рука
Зямной апекай абдымала.
Пачутых словаў аксаміт
Па цёплых думках разліваўся.
Мы з ёй сустрэліся на міг,
А светлы міг навек застаўся…
Вікторыя Смолка
Вікторыя Смолка – студэнтка ГрДУ імя Янкі Купалы філалагічнага факультэта, са школьных гадоў удзельніца шматлікіх міжнародных, рэспубліканскіх і абласных конкурсаў і фестываляў творчых дзяцей і моладзі. З маленства піша вершы на беларускай і рускай мовах, захапляецца музыкай і літаратурай. Яе паэтычныя творы пра “Дзяўчынку і Мару”, пра “Вясніцу” і “Вяснянку”, пра “Сінякрылы цягнік” добра вядомыя чытачам “Літаратуры і мастацтва”, “Маладосці”, “Белай вежы”, “Новаму замку”, “Паэзіі Мегаполіса”, “Перспектыве” і г.д. У мінулым 2015 г. ў свет прыляцела першая вершаваная ластаўка Вікторыі Смолкі, што мае назву “Зоркаму сэрцу”. Дэбютная кніжка вершаў паўстае як прысвячэнне людзям, якім Богам дадзена бачыць і разумець гэты свет сэрцам і праз сэрца.
Вікторыя Смолка: “Я шчаслівая, бо са мной заўсёды мая Мара, мая духоўная мама, творчая апякунка, мая сяброўка, якая верыць ў мае вершаняткі і вершы. Чарговым запрашальным білетам на асенні фестываль дорыць білет у светлае заўтра, у Будучыню, дзе замест белага кія ў маёй замерзлай руцэ цёплая далонь Мары…”.
Жыву не так, жыву іначай –
Жыву, як неба раіць мне,
Але я бачу, зорка бачу
Усмешкі мілыя – у сне.
Адна пайду, і сэрца зоймуць
Кляновы баль, асенні вальс.
Няхай мне бачыцца па-свойму
Усё звычайнае для вас.
Няхай мне сніцца летуценна
І адчуваецца наскрозь
Усё, заплюшчанае цемрай,
Усё прыгожае, што ёсць...
Вікторыя Смолка
