18–19 сакавіка 2025 года ў Інстытуце мовазнаўства імя Якуба Коласа Дзяржаўнай навуковай установы “Цэнтр даследаванняў беларускай культуры, мовы і літаратуры” НАН Беларусі адбылася Рэспубліканская навуковая канферэнцыя “Беларускае гістарычнае мовазнаўства: стан і перспектывы развіцця” і круглы стол, прысвечаныя 90-годдзю з дня нараджэння беларускага лінгвіста, доктара філалагічных навук, прафесара, члена-карэспандэнта НАН Беларусі, лаўрэата дзяржаўнай прэміі Рэспублікі Беларусь Аляксандра Мікалаевіча Булыкі.
На пачатку канферэнцыі прывітальныя словы з віншаваннямі гучалі ад прадстаўнікоў розных вышэйшых устаноў рэспублікі. С.Г. Ляскевіч зачытала прывітальны адрас ад Рэктара Гродзенскага дзяржаўнага ўніверсітэта імя Янкі Купалы, у якім адзначалася, што гэтая знакавая дата з’яўляецца не толькі знамянальным момантам у жыцці юбіляра, “але і вялікай падзеяй для ўсіх нас, калег і аднадумцаў, хто неабыякавы да лёсу беларускай мовы”. І.Ф. Кітурка падкрэсліла неверагодна вялікі ўнёсак А.М. Булыкі ў навуку: “звыш чатырохсот публікацый, сярод якіх больш за 10 манаграфій і больш за 20 слоўнікаў – гэта не толькі прыклад высокага прафесіяналізму і адданасці сваёй справе, а сапраўдная галерэя беларускага слова. “Гістарычны слоўнік беларускай мовы” – унікальная спадчына, у якой злучаюцца культурныя і гістарычныя аспекты беларускага грамадства”.
Шчырыя пажаданні здароўя і далейшага прафесійнага натхнення разам з баначкай цалебнага верасовага мёду перадаў акадэміку прафесар Даніловіч Мікалай Аляксандравіч.
Праца канферэнцыі працягнулася ў двух секцыях. С.Г. Ляскевіч прэзентавала свой даклад ў секцыі “Надзённыя пытанні сучаснага беларускага мовазнаўства”.
19 сакавіка ў рамках круглага стала “Аляксандр Мікалаевіч Булыка: асоба, вучоны, педагог” адбылася прэзентацыя “Гістарычна-этымалагічнага слоўніка іншамоўнай лексікі ў старабеларускай мове” (2025) А.М. Булыкі.
