24 кастрычніка ў вучэбным корпусе па вуліцы Леніна-32 адбылося ўрачыстае адкрыццё імянной аўдыторыі доктара філалагічных навук, прафесара Івана Якаўлевіча Лепешава. Славутаму беларускаму мовазнаўцу сёлета споўнілася б 100 гадоў.
Унёсак прафесара І.Я. Лепешава ў беларускую навуку немагчыма пераацаніць: на аўтарскім рахунку вучонага 650 артыкулаў і 47 кніг, сярод якіх 8 манаграфій, 17 слоўнікаў, 14 вучэбных дапаможнікаў і 8 навукова-папулярных кніг. Грунтоўныя даследаванні І.Я. Лепешава па лінгвістыцы, літаратуразнаўстве, асобных пытаннях айчыннай гісторыі прайшлі выпрабаванне часам і пацвердзілі сваю навуковасць, доказнасць і запатрабаванасць.
З уступным словам да выкладчыкаў і студэнтаў звярнулася загадчык кафедры беларускай філалогіі А.С. Садоўская, якая адзначыла, што ў сценах Купалаўскага ўніверсітэта прайшоў самы плённы перыяд навуковай дзейнасці прафесара. Права адкрыць імянную аўдыторыю, памятную дошку і стэнд у гонар І.Я. Лепешава было дадзена прарэктару па навуковай працы Н.З. Башун і намесніку дэкана філалагічнага факультэта А.І. Кавальчук. Прарэктар падкрэсліла выключна самаадданую і карысную працу вучонага на навуковай і педагагічнай ніве. Цёплымі ўспамінамі пра сумесную працу на кафедры падзяліліся ганаровы ветэран працы, дацэнт З.П. Данільчык і доктар філалагічных навук, прафесар М.А. Даніловіч, які паставіў асобу І.Я. Лепешава ў адзін шэраг з такімі выдатнымі славістамі, як І. Насовіч, М. Федароўскі і Я. Карскі. У расказах запрошаных гасцей З.М. Тамашэвіч, А.У. Крофты, Т.Р. Прадзед, былой студэнткі, пазней – галоўнага спецыяліста абласнога ўпраўлення адукацыі, постаць прафесара І.Я. Лепешава згадвалася ў самых светлых фарбах. Дырэктарам бібліятэкі ўніверсітэта М.У. Грынько, а таксама яе супрацоўнікамі, была арганізавана выстава і прэзентацыя навукова-педагагічнай спадчыны прафесара І.Я. Лепешава, прадэманстраваны бібліяграфічны паказальнік навуковых прац, выдадзены імі да 100-годдзя з дня нараджэння мовазнаўцы.
