“…ПАСТУПАЙ НА ФІЛАЛАГІЧНЫ !”
Загадчык кафедры беларускай літаратуры А.Э. Сабуць і дацэнт кафедры беларускай літаратуры Р.К. Казлоўскі арганізавалі і прынялі непасрэдны ўдзел 25 лістапада 2016 г. у літаратурнай сустрэчы пісьменнікаў Гродзешчыны з вучнямі старэйшых класаў некалькіх школ Воранаўскага раёна на базе УА “Навучальна-педагагічны комплекс Канвелішскія яслі-сад-сярэдняя школа”. Гродзенскія творцы (старшыня абласнога аддзялення СПБ Л.А. Кебіч, намеснік старшыні абласнога аддзялення СПБ Д.М. Радзівончык, паэт У.В. Руль), а таксама маладыя паэтэсы, студэнткі 4-га курса спец. “Беларуская філалогія” В. Смолка і А. Паўлоўская падарылі для залы свае шыкоўныя вершы, падзяліліся таямніцамі філалагічнага майстэрства. Аздобілі святочную ўрачыстасць і чароўна-вабныя песні ў арыгінальным выкананні студэнтаў спец. “Беларуская філалогія” А.Даўгаполік (3 курс) і Дз.Даўгаполіка (4 курс).
Адметна і тое, што да шматлікай вучнёўскай публікі звярнуліся намеснік начальніка аддзела адукацыі, спорту і турызму Воранаўскага райвыканкама П.В. Тарчынскі і загадчык сектара агульнай і дашкольнай адукацыі аддзела адукацыі, спорту і турызму Воранаўскага райвыканкама Л.І. Запаснік, якія актуалізавалі запатрабаванасць філалагічнай камунікацыі ў грамадстве. Завяршылася імпрэза прыемна-хвалюючым абменам кніг-падарункаў, якія ёсць святам для душы сапраўднага славесніка.
Згаданае ўрачыстае мерапрыемства мела прафарыентацыйны накірунак, што, хочацца спадзявацца, пазітыўна адгукнецца на фармаванні асобаў маладога пакалення філолагаў.
