Семінар са школамі Кастрычніцкага раёна г. Гродна
Кафедра беларускай філалогіі Гродзенскага дзяржаўнага ўніверсітэта імя Янкі Купалы працягвае добрыя традыцыі супрацоўніцтва па розных накірунках дзейнасці са школамі г. Гродна і Гродзенскай вобласці. 14 сакавіка 2024 года на базе “Сярэдняй школы № 6 імя Г.А. Гарнавых г. Гродна” ў рамках семінара “Малады настаўнік: праблемы, пошукі, знаходкі” было арганізавана і праведзена пасяджэнне раённай творчай групы настаўнікаў беларускай мовы і літаратуры па тэме “Прафесійная кампетэнтнасць настаўніка беларускай мовы і літаратуры ў працэсе падрыхтоўкі да конкурсаў работ даследчага характару і рэспубліканскай алімпіяды”.
Выкладчыкі кафедры, сярод якіх Варановіч В.Л., Сабуць А.Э., Казлоўскі Р.К., Шандроха Н.Э., Садоўская А.С., Тарасава С.М., выступілі перад настаўнікамі школ Кастрычніцкага раёна г. Гродна з метадычнымі парадамі і рэкамендацыямі па падрыхтоўцы і напісанні навукова-даследчых прац вучнямі ўстаноў агульнай сярэдняй адукацыі. Падчас творчай дыскусіі былі абмеркаваны самыя разнастайныя накірункі дзейнасці настаўніка і вучня ў працэсе падбору тэмы навуковага даследавання, захавання ўсіх неабходных патрабаванняў пры напісанні прац такога тыпу. Выкладчыкамі кафедры былі дэталёва прааналізаваны моцныя і слабыя бакі канкрэтных навукова-даследчых прац, прапанаваны рэкамендацыі, накіраваныя на паспяховае навуковае даследаванне. Падчас дыялогу з настаўнікамі была звернута ўвага на магчымасць атрымаць прафесійную кансультацыю вопытных выкладчыкаў кафедры беларускай філалогіі ў межах паслуг “Юныя навукоўцы” і “Да алімпійскіх вяршыняў”.
