Цыцэроній-2019
Новыя вышыні і новыя перамогі!
23-24 мая 2019 года ў Мінску адбыўся Міжнародны конкурс аратарскага майстэрства «Цыцэроній-2019». Па шматгадовай усталяванай традыцыі ў ім прынялі ўдзел і студэнты купалаўскага ўніверсітэта.
Усяго ў гэтым годзе Акадэмія МУС Рэспублікі Беларусь, на базе якой звыкла ладзіцца конкурс, прыняла 46 удзельнікаў з 25 ВНУ і з 10 розных краін. У конкурсе, акрамя студэнтаў з беларускага боку, выступілі прадстаўнікі Украіны, Расіі, Індыі, Кітая, В'етнама, ЮАР, Японіі, Туркменістана, Таджыкістана.
Знакавым з'яўляецца і тое, што ў чарговы раз Гродзенскі ўніверсітэт быў названы сярод іншых ВНУ, як адзін з тых, дзе надаецца вялікая ўвага Яго Вялікасці Слову і вучаць прафесійна абыходзіцца з ім. Гэта пацвярджаецца тым, што ўжо каторы год запар студэнты купалаўскага ўніверсітэта аказваюцца сярод пераможцаў.
РАДКОВІЧ АЛЯКСАНДРА, студэнтка 3 курса спецыяльнасці «Беларуская філалогія», уладальніца тытула «Студэнт года – 2017», стала пераможцам міжнароднага конкурса «Цыцэроній-2019». Яна заняла ІІ месца, першае сярод беларускіх студэнтаў, саступіўшы вышэйшую ўзнагароду (І месца) госці-ўдзельніцы з Украіны, студэнтцы Акадэміі МУС г.Кіева.
Годна прадставілі ГрДУ імя Янкі Купалы і навучэнка падрыхтоўчага аддзялення з Індыі ХЕНРЫ КЕЗІЯ ЕВАНГЕЛІН, якая заняла 3 месца, а таксама студэнтка 3 курса педагагічнага факультэта ДАР'Я МАСКАЛЬЦАВА, якая стала лаўрэатам конкурса «Цыцэроній-2019».
У працы журы конкурса, якое склалі выкладчыкі 10 ВНУ з Беларусі, Украіны, Расіі, прыняла ўдзел Тарасава Святлана Мікалаеўна, старшы выкладчык кафедры беларускай філалогіі.
Сардэчна вітаем і шчыра віншуем студэнтаў - удзельнікаў конкурса аратарскага майстэрства, якія ў чарговы раз годна адстаялі гонар сваёй alma mater – Гродзенскага дзяржаўнага ўніверсітэта імя Янкі Купалы.
